Wat bin ’k toch ok een sentimentele pekelhering! En dat liekt mit et oolder wodden allienig nog mar slimmer te wodden. Et is meer as droevig, mar ik bin nogal gauw van de mik.

Jaoren en jaoren he’k lease-poezen had. De opienvolgende poezen van de buren kwammen ok bi’j mi’j over de heerd. Dat was hatstikke genoeglik, zowel veur de poezen as veur mi’j. Zodoende komt mi’j hier sund een jaor een behendig zwat-wit kattien gezelschop holen. Dat we bin zo staorigan hielemaole an mekaander wend en kun meraokelse goed akkederen. We hebben nooit spul. Now ja, as hi’j een bloempot van de veensterbaank remaait, zeg ik wel es een peer malle woorden. En as hi’j de voegelties mit slechte bedoelings beloert, gooi ik daor een etisch gesprek tegenan. Mar veerder biwwe de beste buisies!

Mar doe kwam de buurvrouw laestdaegs bi’j me an de deure. Ze wol et mi’j et eerste zeggen. Ze hadden een aander huus kocht en heur huus naost mi’j kwam te koop. Die tiedinge was een bliksemslag bi’j heldere hemel! We hebben dattig jaor naost mekaander woond, ik hebbe d’r poerbeste buren an had, en ie moe’n mar ofwaachten wat d’r veur in de plak komt. Ie weten waj’ hebben, niet waj’ kriegen. Dat now ja, ik vun et een allemachtig vervelende bosschop.

Mar doe ze vot was, drong et pas echt tot me deur. En dat poesien dan? Dat nammen ze vanzels mit! En ikke dan? In disse koronatied praot ik soms daegenlaank allienig mar mit poes. Ik kan niet zonder him en hi’j ongetwiefeld ok niet zonder mi’j. Dat is een ding dat zeker is. Wat een ellende! En dan is die bekende Stellingwarver schriever zomar inienend een onooglik, verdrietig mannegien. Dat... ik bin naor de buren gaon. As poes ok bi’j mi’j blieven moch... En dat moch! Dat moch echt! Dat now krigt hi’j hier al volop eten en drinken. Ik hebbe een maantien veur him kocht. De timmerman komt om een loekien in de deure te maeken en ik zal mit him naor de dieredokter om him chippen te laoten. En we bin allebeide toch zo allemachtige bliede! Want wi’j kun gewoon niet zonder mekeer!

qjohan@johan-veenstra.nl

Je kunt deze onderwerpen volgen
Opinie
Column
Plus artikel gelezen
Je las zojuist een artikel.
Onbeperkt PREMIUM-artikelen lezen?

Lees nu PREMIUM vanaf € 1,15 per week. Je krijgt dan onbeperkt toegang tot al onze artikelen, video’s, columns en meer.

Probeer PREMIUM direct